CEBU, Philippines – Pormal nga magsugod sa operasyon ang passenger terminal 2 (T2) sa Mactan-Cebu International Airport karong Hulyo 1.
Kini ang gitug-an ni Avigael Maningo, corporate communications manager sa GMR-Megawide Cebu Airport Corporation (GMCAC) atol sa gihimo nga media tour sa T2 kagahapon sa buntag.
Matud ni Maningo nga gikan sa Shanghai, China ang maiden flight nga moabot sa kadlawon sa bag-ong terminal ug mobiya kini sa samang adlaw balik sa China.
Gipaneguro sa GMCAC nga hapsay ang pagpahigayon og check-in ilabi na sa Immigration ug Security Check Areas tungod sa gidaghanon.
Gipasigarbo sa GMCAC ang ilang Tray Retrieval System ug Rapiscan System nga mas paspas sila sa pag-scan sa mga hand carry baggage ug sa mga pasahero.
Himoon ang blessing sa terminal pinangulohan sa kadagkuan sa GMCAC, MCIA General Manager Steve Dicdican ug Lapu-Lapu City Mayor Paz Radaza karong Sabado.
Gihatagan ang publiko kutob ugma sa pagbisita ug pagtan-aw sa bag-ong terminal diin abli gikan sa alas 9 sa buntag hangtud alas 5 sa hapon.
Ang publiko giawhag nga moparehistro una sa Facebook page sa MCIA. (/GMR)(BANAT NEWS)