CEBU, Philippines – Ang Philippine Atmospheric, Geophysical and Astronomical Service Administration sa Mactan niklaro nga walay dakong bad weather system nga masinati ang Sugbo gawas lamang niining kalit-kalit nga pagbunok sa ulan uban ang pagpanugdog ug kilat tungod sa localized thunderstorm.
Niini lang buwana, upat na ka tawo ang nakalas human nangaigo og kilat didto sa Dakbayan sa Toledo, Balamban ug Argao.
Si Al Quiblat, officer-in-charge sa PAGASA Mactan nga nahinabi sa Banat News miingon nga karong adlawa makasinati og panagsa ngadto sa madag-umon nga kalangitan inubanan sa pat-ak pat-ak nga ulan tungod gihapon sa localized thunderstorm ang Sugbo.
Dugang pa ni Quiblat nga makasinati og init sa buntag apan moulan ini og hapon hangtud gabii. Magdala kini og hinay ngadto sa kasarangang hangin ug gagmay og kasarangang pagbalod ang kadagatan.
Ang pagbunok sa uwan nakamugna og mga pagbaha sa Metro Cebu sa nanglabay nga mga adlaw. (/IBM)(BANAT NEWS)