Mandaue jail personnel imbestigaron

CEBU, Philippines – Tanang personnel sa Mandaue City Jail ang gipaubos sa imbestigasyon human sa pagpusil patay sa high profile inmate nga si Steve Go.

Matud ni Chief Inspector Atty. Dennis Aliño, tigpamaba sa Bureau of Jail Management and Penology-7, nagpahigayon na sila karon og imbestigasyon ilabi na kung giunsa ug kinsa ang nagdala sa .38 revolver nga armas nga maoy gigamit sa laing piniriso nga si Cresenciano Eraña sa pagpatay kang Go.

Sumala pa ni Aliño nga kung makita nga adunay nakalapas posibleng mag-atubang og administrative discipline hinungdan nga ila gitutukan ang administrative ug operational aspect.

Bukas ra usab ang BJMP sa imbestigasyon sa Commission on Human Rights.

Ang chief investigator sa CHR-7, Leo Villarino, nitug-an nga dili pa sila mohimo og imbestigasyon kay ila una itugyan sa kapolisan ug BJMP.

Si Police Regional Office-7 director, Chief Supt. Debold Sinas, niingon nga magtagbo pa sila sa opisyal sa BJMP-7 alang sa joint investigation.

Samtang gisuspenso ang pribilihiyo sa pagbisita sa mga piniriso sa Mandaue City Jail  human sa maong insidente.

Si Jail Superintendent Jessie Calumpang, warden sa bilanggoan, niingon nga ibalik ang pagdawat og bisita sa mga binilanggo karong Sabado.

Kasamtangan karon nilang gihimo ang paghigpit nga pagsusi sa bilanggoan human sa hitabo diin nasuta nga daghang lungag sa nagkadaiyang dapit sa pasilidad.

Sa laing bahin, gipaneguro sa warden sa Cebu Provincial Detention and Rehabilitation Center (CPDRC) nga dili mahitabo sa pasilidad ang nahitabo sa Mandaue City Jail.

Matud ni Reynaldo Valmoria, warden sa CPDRC, nga priority concern nila sa prisohan ang security measures nga ilang gipatuman.

Pipila lang sa gikonsiderar nga high profile inmates sa CPDRC mao sila si Alvaro "Barok" Alvaro ug kanhi bokal sa Bohol, Niño Rey Boniel. (Romeo T. Limpangog ug Le Phyllis F. Antojado/GMR)(BANAT NEWS)