Parada sa mga LGBT karong Domingo

CEBU, Philippines — Adunay kapin sa 1,800 ka Lesbian, Gay, Bisexual ug Transgender (LGBT) nga gikatakdang magtapok ug magpahigayon sila og parada sa kadalanan sa Mandaue City karong Domingo sa buntag.

Ang pagpahigayon nila og parada kabahin lang sa daghan pa nga kalihokan sa mga LGBT sa maong adlaw. Ang mga mosalmot sa parada mga LGBT nga gikan sa nagkalainlaing lugar sa probinsya.

Si Mandaue City Treasurer Regal Oliva miingon nga makahimo pagsalmot sa ilang kalihokan ang tanang LGBT, bisan kadtong dili pa sakop sa ilang kahugpongan.

Matud ni Oliva nga usa lang kini ka pagpakita nga ang mga LGBT dinhi sa Sugbo nagkahiusa ug nagpaila nga sila kabahin sa pagpalambo sa atong nasud. Ang parada nga gitawag og March Pride anha magsugod sa Mandaue City Hall ug mopaingon sa Ibabao, dayon mosubay sa dalan A.C. Cortes paingon sa eskina sa dalan Plaridel sa Barangay Alang-Alang, ug mosubay pagbalik sa dalan Plaridel sa pagbalik na sa City Hall. Ang kagamhanan sa Dakbayan sa Mandaue miila sa mga LGBT nga nakatampo usab sa kalamboan sa siyudad. (BANAT NEWS)