CEBU, Philippines — Gimando ni PNP Chief Oscar Albayalde nga bantayan kadtong mga polis nga gipangbalhin sa Mindanao ug gikatahong wala na mo-duty ug namalik dinhi sa Sugbo kay posible nga nalambigit sila og ilegal nga kalihokan.
Matud ni Police Regional Office-7 Director Debold Sinas nga usa kini sa kamandoan ni Albayalde atol sa pag-anhi niya sa Sugbo kaniadtong miaging semana. Nahibaw-an nga kadtong opisyal sa PNP nga napatay sa kapolisan atol sa buy-bust operation didto sa Mandaue City dinhi madestino sa Sugbo apan gibalhin sa Negros, apan mipauli dinhi og na-buy-bust sa kapolisan.
Si Senior Inspector Raymond Hortezuela gipusil ug napatay sa mga operatiba sa PNP Counter-Intelligence Task Force kay matud pa misukol unta dihang nakabantay nga polis ang mipalit kaniya’g shabu.
Ang ngalan ni Hortezuela ug ni PO3 Jonathan Tilos nga sakop sa Ginatilan Police Station, parehong nalakip sa listahan sa mga “narco cop” apan si PO3 Tilos wala masakpi nga namaligya og shabu.
Si PO3 Tilos gipatay sa mga wala hiilhing tawo nga mipaarak kaniya og daghang bala samtang luwan ang polis sa iyang sakyanan didto sa lungsod sa Alegria sa miaging semana. Ang iyang kabanayan makadawat og benepisyo.
Ang laing kamandoan sa PNP Chief aron pagwagtang sa Cebu sa titulo nga “hotspot” sa shabu, mao ang pakig-alayon sa ubang tinugyanan sa balaod, sama sa Philippine Drug Enforcement Agency.
Kadtong mga badlongong polis dili na hatagan og laing ‘warning’ kon sila maghimo og mga binuang, sama sa pag-apil sa negosyo sa drugas, ug ipahamtang gyud kanila ang tukmang balaod.
Ang mga pamilya sa kapolisan nga mapatay tungod sa pagkalambigit nila sa ilegal nga drugas, dili gayud makadawat og benepisyo gikan sa kagamhanan. (BANAT NEWS)