CEBU, Philippines – Mopahigayon ang Cebu City Police Office og information operation sa mga guwardiya sa mga pantalan ug terminal kabahin sa bag-ong modus sa pagpalusot og drugas.
Kini sumala pa ni CPPO director, Senior Supt. Joel Doria, human nasuta nga ang mga tinubdan sa shabu sa mga nadakpan nga sila si Catalino Oliveros Jr. alyas Chats ug Joel Castro gikan pa sa Manila diin gibiyahe pinaagi sa Roll-on/Roll-off (RoRo) nga barko.
Modus sa magdala ang magpakaaron-ingnong turista kinsa magdala og dagku kaayo nga backpack nga adunay mga shabu ug pun-on nila og bulingon aron dili na maukayan sa mga guwardiya ang shabu sa ilawom niini nunot sa kabaho sa ilang mga dala.
Tambag ni Doria nga kun makasugat og mga ingon niini ang mga guwardiya, kinahanglang ang mismong tag-iya sa bag ang moukay sa sulod.
“Although it will cause minor delay, para lang makaseguro tayo na walang makatawid na illegal drug dito sa Cebu City,” matud ni Doria.
Sila si Castro ug Oliveros giingong nalambigit sa tulo ka drug groups sa Dakbayan sa Sugbo. (/GMR)(BANAT NEWS)