72.9% inmates sa CPDRC nag-atubang og drug case
CEBU, Philippines — Niabot ngadto sa 72.9 porsiyento sa kinatibuk-ang populasyon sa inmates sa Cebu Provincial Detention and Rehabilitation Center (CPDRC) ang nag-atubang og kaso kabahin sa ilegal nga drugas.
Base sa gipahigayong profiling sa mga inmates, sa 3,894 ka inmates ang 2,840 niini ang nag-atubang og kaso kabahin sa ilegal nga drugas kinsa uban kanila nakonbikto na samtang ang uban padayon pa ang kaso.
Sa pagkakaron, nagpadayon pa ang profiling process sa mga inmates aron masuta ug masala ilang records.
Ang records i-encode sa usa ka database isip unang lakang aron sa pagbuhat sa rehabilitation program framework alang sa matag inmate.
Matud ni CPDRC Warden Reynaldo Valmoria paningkamutan nila sa management nga mahuman ang profiling sulod sa usa ka bulan. Human sa profiling isunod ang mga physical examinations sama sa medical and drug testing.
Ang tumong sa maong mga test aron sa pag-monitor sa level sa drug independence sa usa ka tawo aron mahibaw-an sa medical professional unsay angayang buhaton. (/BDB)(BANATNEWS)
- Latest
