Ting-ulan nagsugod na

CEBU, Philippines – Sugod kagahapon pormal na nga gipahibalo sa PAGASA nga sugod na ang panahon sa ting-uwan.

Kini ang gipahibalo ni Engr, Oscar Tabada, ang hepe sa PAGASA-Visayas samtang ang Bagyong Domeng nikusog ngadto sa usa ka tropical storm nga nipakusog pa sa hanging habagat.

Matud ni Tabada nga tungod sa mga pag-ulan nga nasinati sa niaging mga adlaw sa southwest monsoon kon hanging habagat, nagkonpirmar kini sa pagsugod na gyud sa ting-ulan.

Sumala pa ni Tabada nga bisan og ting-ulan na, may masinati gihapon nga dry season sulod sa pipila ka adlaw ngadto sa duha ka semana diin padayon usab gihapong masinati ang mga pag-unos ilabi na sa eastern section sa Kabisay-an ug sa Southern Luzon nga masinati sa ilang kadagatan ang pagkabaluron ngadto sa grabeng baluron.

Ang sentro sa tropical storm Domeng anaa sa 655km silangan sa Tuguegarao City, Cagayan nga adunay gikusgon sa hangin nga 65 kilometros matag takna ug paghaguros nga 85km matag oras ug nag-irog kini 17km matag oras sa north-northeast. (/GMR)(BANAT NEWS)