Pangilad gihimakak sa kanhi uyab sa langyaw

CEBU, Philippines — Gihimakak sa 34-anyos nga si Lovely Ann Enad nga iyang giilad ang usa ka langyaw nga iya kanhi uyab.

Ang piskaliya nipasaka sa kasong estafa batok kang Enad human nakakita og igong basehan sa pasangil ni Hans Goran Gunneriusson, usa ka Swedish national.

Si Gunneriusson nipasangil nga nagpakaaron-ingnon si Enad nga dalaga ug gipapalit og real property balor og P2.5 milyones sa Dakbayan sa Lapu-Lapu.

Matud ni Prosecutor III Rhodna Alcala-Bacatan nga iyang gihatagan og higayon si Enad sa pagduso og tubag apan napakyas kini.

Gipasabot ni Enad nga wala siya nangilad kang Gunneriusson ug gani ang langyaw pa ang nibayad sa pagsang-at niya og annulment case batok sa  kanhi bana niini nga si Felomino Enad.

Giingong siya ug si Felomino lima na ka tuig nga buwag niadtong higayuna nga nagkaila sila ni Gunneriusson niadtong 2015 sa usa ka swimming pool sa Lapu-Lapu City.

“How come mangilad ko, he knows everything,” matud ni Enad.

Matud sab ni Enad nga wala siya nakaduso og counter-affidavit kay sayop ang gihatag nga address diin ang tinuod niyang pinuy-anan mao ang Mactan Plains Subdivision Phase 2 Block 5 Lot 8, Mactan New Town, Lapu-Lapu  City.

“Wala ko ka reply kay gilain ang address and I have all documents nga wala nako siya giilad kay siya mismo gabayad sa akong annulment,” matud ni Enad kinsa nidugang nga anaa pa sa korte ang annulment case.

Matud ni Enad nga pagkahibawo ni Gunneriusson nga minyo siya, dili na unta kini makig-date kaniya ug dili na mopalit og butang nga balor og P2,483,960.58.

Nagtuo si Enad nga tungod sa duha ka kaso nga iyang gipasaka batok sa langyaw tungod sa pagpangulata ang nagtukmod sa pasangil ilabi na nga nalutsan kini og hold departure order.

Nagbuwag na si Enad ug Gunneriusson niadto pang tuig 2016. (/GMR)(BANATNEWS)