Balay sa election officer sa San Francisco girakrakan
CEBU, Philippines — Balay sa election officer sa lungsod sa San Francisco, isla sa Camotes girakrakan sa duha ka wala mailhing tawo niadtong Biyernes sa tungang gabii.
Si Police Chief Inspector Leo Ty, hepe sa San Francisco Police Station nagkanayon nga wala’y naangol sa maong pagpangrakrak apan ang Isuzu D-Max sa election officer nga si Lito Arquillano ug ang gate sa balay niini maoy nalungag-lungag sa mga bala.
Niadtong higayona si Arquillano anaa nganhi sa Sugbo ug ang nahibilin sa balay niini ang iyang anak, bayaw ug caretaker sa ilang manokan kinsa parehong nahinanok na sa pagkatulog atol sa hitabo.
Na-recover sa kapolisan diha sa lugar nga nahitaboan ang duha ka slug diha sulod sa sakyanan ug laing lima ka basiyo sa bala sa 9mm pistol diha sa gawas.
Matud ni Ty nga duha ka anggulo ang ilang gisubay sa imbestigasyon nga naglakip sa negosyo ug election related.
Wala usab gisalikway sa hepe ang posibilidad nga pagpanghadlok lang ngadto sa election officer ang maong hitabo.
Sa laing bahin, ang director sa Cebu Provincial Police Office (CPPO), Police Senior Superintendent Manuel Abrugena mibutyag nga nihatag na siya og direktiba kang Ty sa pagpalawom sa imbestigasyon sa hitabo.
Giawhag usab ni Abrugena ang kapolisan sa San Francisco nga pahugtan ang ilang checkpoint ug ang police visibility sa mga pinuy-anan sa mga government official ilabi na kadtong mga nidaog ug napildi sa bag-o lang nahuman nga piniliay. (/BDB)(BANATNEWS)
- Latest
