CEBU, Philippines — Pormal na nga mideklarar og gubat batok cyber-pornography ang pipila ka mga mayor sa lalawigan sa Sugbo kansang mga lungsod ug dakbayan adunay problema niini.
"Sa akong lungsod I declare war, whoever they are, they are my enemies " matud ni Cordova Mayor Teresa Sitoy-Cho kansang lungsod nabaniog kaniadto tungod sa online sexual exploitation (OSEC) sa mga bata.
Adunay mga ordinansa ang lungsod pagbatok sa bisag unsa nga matang sa malaw-ay nga binuhatan ilabi na kon ang mga biktima mga bata.
Apan giangkon sa mayor nagpabilin gihapon ang problema tungod aduna pa gihapon nagpadayon sa operasyon niini.
Apil sa nasakop sa ordinansa mao kining money transfer nga nag-require sa mga establisamento pagsumbong dayon sa kapolisan kon makapahibulong ang mga transaksyon.
Apan makalusot gihapon ang mga cybercrime operators kay adto sila sa gawas sa Cordova magkuha sa kwarta.
“Our ordinance still remains useless if the suspects can still transact with their clients through money transfer firms outside our town," matud ni Sitoy.
Ang lungsod migahin og P20 mil nga ganti matag impormante nga makahatag og impormasyon kalabot sa mga cyberpornography sa lungsod.
Mao usab kini ang gihimo karon sa lungsod sa San Fernando isip pamaagi pagbatok sa human trafficking ug online sexual exploitation sa lungsod.
Matud ni Mayor Neneth Reluya nga mohatag sila og P5 mil hangtod P15 mil alang sa makahatag og impormasyon sa kapolisan kalabot sa cyberpornography sa ilang lungsod.
Si Bise Gobernador Agnes Magpale kinsa maoy chairman sa Provincial Women's Commission (PWC) nagkanayon nga hagit alang sa LGUs kining maong krimen tungod mas dali na ang pag-access sa internet pinaagi lang sa mga cellphones. (/IBM)(BANATNEWS)