CEBU, Philippines — Pito ka mga jailguards sa Mandaue City Jail ang girelibohan ug gipaubos karon sa imbestigasyon tungod sa pagdudang aduna kanilay direktang komunikasyon kang Steve Go, ang high value drug inmate nga natanggong sa maong prisohan.
Gitug-an ni Jail Supt. Jessie Calumpang sa Banat News, tulo ka adlaw ang nilabay, pito nila ka mga sakop ang girelibohan sa rehiyonal nilang buhatan.
Matud pa nga sila gidudahang may kalambigitan sa pagpalusot og kontrabando sa maong prisohan.
Ang maong mga jail guards nagdala og ranggo nga Senior Jail Officer 3 ug mga Jail Officer 1.
Sumala pa ni Calumpang gipaubos karon sa imbestigasyon ang pito kung kinsa kanila ang konektado ni Go ug kinsa usab nila ang mga kauban niini.
Matud ni Calumpang nagpadayon ang paglimpyo sa BJMP sa ginsakopan niini sama sa paninguha nilang mahunong kining pagsud sa mga kontrabando sa ilang prisohan.
Tungod sa pagrelibo sa pito, nihangyo si Calumpang sa ilang rehiyonal nga buhatan nga dugangan ang personnel sa MCJ ug para mabutang si Go sa usa ka selda nga adunay mga cctv camera aron ma-monitor nila kini. Ang MCJ aduna ray 44 ka mga tawo nga maoy nagbanos-banos og bantay sa 1,801 ka mga priso. Matud pa sobra og 119 ka priso ang pasilidad.
Mahinangpon si Calumpang kung adunay CCTV camera nga mahatag ang rehiyonal nga buhatan apan mangayo siya og ayudad sa lokal nga pangagamhanan sa Mandaue.
Atol sa uwahing greyhound operation, 11 ka mga cellphone ang nakuha sa selda nila ni Go ug uban pa nga mga kontrabando sama sa drug paraphernalia, cash nga P2 mil, mga pakete sa sigarilyo gikan sa lain-lain nga selda. (Romeo T. Limpangog/IBM)(BANATNEWS)