Baliw-Baliw Festival sa Olango gihugopan

CEBU, Philippines – Gihugopan sa mga lokal ug mga langyaw nga turista ang “Baliw-Baliw” Festival sa Barangay San Vicente, Isla sa Olango, Dakbayan sa Lapu-Lapu sa niaging adlaw.

Kabahin kini sa tinuig nga kapistahan diin mga binuang nga lihok ang gipakita nga nasunod sukad pa sa mga katiguwangan.

Si Barangay Kapitan Cyrus Eyas niingon nga iyang namatikdan nga nagkadaghan ang mga dumuduong ug mga turista nga nisaksi sa kalingawan. Matud ni Eyas nga mga bata pa ang ilang mga apohan gihimo na ang maong kalihukan matag saulog sa piyesta sa patron nga si San Vicente Ferrer.

Sumala pa niya nga gikasabutan na unta sa komitiba nga wagtangon na ang mga law-ay nga talan-awon apan ang mga molupyo dili kapugngan nga mohimo sa ilang kaugalingon uban sa pagtuo nga kun dili nila himoon magsakit-sakit ang ilang pamilya o masinati nila ang katalagman.

Atol sa okasyon makita ang nagpaaway og iring ug itik o manok ug uban pang gitawag og makabaliw nga kalihukan. Gilauman nga ang maong kalihukan mahimong   tourist attraction sa barangay. (/GMR)(BANAT NEWS)