CEBU, Philippines – Usa ka lalake ang naangol human mabanggai sa usa ka Mitsubishi Montero nga nagtangag sa plakang YKX-407 nga giingong nagdaot ang makina kagahapon sa buntag diha sa Redemptorist Church sa Queens Road, dakbayan sa Sugbo.
Ang maong sakyanan nga gimaneho ni Epimaco Mangubat, 73-anyos, taga Guadalupe Heights, dakbayan sa Sugbo giingong misuki kini ug dili na makontrolar ug nagpatuyang na lang og dagan hinungdan nga nabanggaan niini si Rexie Garcia, hingkod ang panuigon residente sa Doña Maria Village 1, dakbayan sa Sugbo kinsa niadtong higayona diha sa lugar nga nahitaboan.
Human mibangga kang Garcia milahos ang sakyanan diha sa adoration chapel sa simbahan ug mibangga ngadto sa punoan sa kahoy hinungdan nga naguba ang atubangang bahin niini lakip na ang tuong bahin nga pultahan ug nabuak usab ang side mirror.
Giingong si Mangubat mibiya kini sa sakyanan human sa maong hitabo ug sa oras sa pagsuwat niining balita ang kapolisan naghuwat nga si Mangubat mopatim-aw diha sa ilang buhatan. (/BDB)(BANAT NEWS)