CEBU, Philippines – Mipadangat sa iyang reklamo ang presidente sa Federation of Mandaue City Urban Poor Incorporated (Fedmacupi) tungod sa pagdemolis sa tulo ka panimalay nga mga sakop niini.
Matud pa ni Norma Garbo presidente sa maong homeowners association nga tulo ka panimalay sa iyang grupo ang giguba sa demolition team sa siyudad bisan og kini diha gitukod sa 9.2 nga ektaryang luna sa siyudad nga gidonar na ngadto sa ilang asosasyon sa panahon pa sa administrasyon ni anhing Mayor Alfredo Ouano.
Si Garbo nga nahinabi sa Banat News miingon nga ang ilang asosasyon benepisyaryo sa 9.2 ektaryang luna nga nahimutang sa barangay Mantuyong, Guizo, Tipolo ug Subangdaku. Ang pangulo sa demolition team nga si Cesar Ylanan nga nahinabi sa Banat News ang mipasabot nga base sa impormasyong ilang nadawat ang tulo ka mga tag-iya sa gidemolis nga mga panimalay sakop sa Lower Tipolo Homeowner Association Inc..
Matud niya igo ra nilang gituman ang mando sa siyudad paghawan sa maong lugar alang sa ugmaron nga dalan nga sumpay sa himuong dalan nga magkonektar sa mga dalan sa Pulang Bukid sa Barangay Alang-Alang, Guizo ug Subangdaku.(Romeo T. Limpangog/IBM)
Koleksyon sa BIR misaka tungod sa TRAIN Law
Misaka ngadto sa P423.1 bilyones ang koleksyon sa Bureau of Internal Revenue (BIR) sa unang kwarter niining tuiga sukad sa pag-implemetar sa kontrobersyal nga Tax Reform Acceleration Inclusion (TRAIN) Law kumpara sa miaging tuig.
Base sa nakuhang datos sa Punongbayan and Araullo Auditing Firm, nisaka og 14 porsiyento ang koleksyon sa BIR kon itandi sa miaging tuig nga adunay P370.6 bilyones.
Dugang pa nga ang nakuhang koleksyon sa unang kwarter mas nitaas kumpara sa ilang gilauman nga 361.8 billion nga target. Ang labing kontributor sa maong koleksyon mao ang Tobacco, Stock Transaction Tax (STT), Foreign Currency Depository Unit (FCDU), Capital Gain Tax of Non-Traded Stocks (CGT NTS), ug Documentary Stamp Tax (DST).
Samtang nitakdo ra sa gilauman nga koleksyon ang sweetened beverages nga adunay kontribusyon nga P7.7 bilyones kumpara sa target nga P7.78 bilyones. Ang mga nakakuha og gagmay nga koleksyon mao ang gikan sa Personal Income Tax (PIT), Petroleum, Value Added Tax (VAT), Coal, Donors, ug estate. Matud sa representante sa Punongbayan and Araullo Auditing Firm nga aduna na gyuy kausaban sa balaod sa buhis human sa miaging pipila ka tuig.
Dugang niya nga maka-adjust ra unya ang katawhan kabahin sa maong kausaban sa dili madugay. (Flaire A. Bayalas/IBM)(BANAT NEWS)