CEBU, Philippines – Nimando og imbestigasyon ang director sa Bureau of Jail Management and Penology-7 human adunay nasakmit nga kontrabando atol sa greyhound operation sa Mandaue City Jail sa nilabay nga semana.
Nimando sab si BJMP-7 Director, Chief Supt. Arnold Buenacosa, sa tanang jail wardens sa rehiyon sa paghimo og subsob nga Operation Linis uban sa Philippine Drug Enforcement Agency ug kapolisan. Kini human duha ka medium pack sa shabu, kagamitan sa pagsuyop, improvised nga icepick ug salapi ang nasakmit atol sa greyhound operation niadtong Biyernes sa Mandaue City Jail.
Tinguha ni Buenacosa nga malikay ang mga piniriso nga magpadayon nga malambigit sa ilegal nga drugas bisan anaa na sila sulod sa prisohan.
Samtang gisubhan ang bag-ong upat ka andana nga bag-ong detention cell sa Barangay Soong, Dakbayan sa Lapa-Lapu niadtong nilabay nga semana ug karong Hunyo 11 subhan na sab ang duha ka andana nga adunay walo ka selda sa Talibon District Jail sa Bohol nga balor og P16 milyones.
Laing usa ka andana nga pasilidad sa Argao District Jail nga balor og P4 milyones ang mahimong magamit na sa gatusan ka piniriso.
Matud ni Buenacosa nga ang maong proyekto lakip sa P333 milyones nga gigahin sa tibuok Rehiyon-7 isip tubag sa grabeng kahuot na sa mga prisohan.
Samtang adunay programa nga gipatuman ang BJMP sama sa Livelihood Projects ug Alternative Learning System aron malikay ang mga piniriso sa ginadili nga drugas ug sa bisan unsa nga mga ilegal nga kalihukan. (/GMR)(BANAT NEWS)