Mayor sa Bohol gipatay

CEBU, Philippines — Gipusil patay sa wala pa hiilhing mga tawo ang mayor sa lungsod sa Buenavista, Bohol nga si Ronald Lowell Tirol sulod sa buwangan didto sa Barangay Asinan, Buenavista mga alas tres kagahapon sa hapon.

Sigun pa sa hepe sa Buenavista Police Station nga si Chief Inspector Rully Lauron nga gitayming gyud sa tulo ka mamumuno nga magsugod na ang sabong sa mga manok diha nga ilang gipusil ang mayor tumong gyud sa iyang ulo.

Upat ka kabhang sa bala ang nakaplagan didto sa dapit diin gipusil ang mayor. Adunay nakakita nga tulo ka wala hiilhing tawo nagdali pagsakay sa duha ka motorsiklo ug tulin kaayong nipadagan palayo human nga gipusil ang mayor.

Ang hepe sa kapolisan nagkanayon nga pipila ka adlaw sa wala pa patya ang mayor, ang biktima nakadawat na og mga pagpanghulga sa iyang kinabuhi gikan sa wala hiilhing mga tawo. Pagka karon, ang kapolisan nagtan-aw sa anggolo nga posibleng politika ug personal ang motibo sa pagpatay sa 47-anyos nga mayor.

Kini tungod kay matud sa hepe sa kapolisan nga wala sila’y nahibaw-an nga mga ilegal nga kalihokan sa mayor. Ang Buenavista, Bohol usa ka third class nga lungsod nga adunay 35 ka barangay. Nahimutang kini habig dinhi sa dakbayan sa Sugbo.

Sa wala pa mahimong mayor sa Buenavista si Tirol, naglingkod na siya pagka bise mayor sukad kaniadtong 2010, ug mibanos lang siya pagka mayor diha nga namatay ang mayor sa maong lungsod.

Kaniadtong eleksiyon sa 2016, nagpapili si Tirol pagka mayor ubos sa United Nationalist Alliance (UNA) ug mikuha’g 9,617 botos, ug gipilde niya ang kandidato sa Partido Liberal nga nikuha lang og 2,955 botos. (BANAT NEWS)