Ika-12 nga gabii sa kabilin hapsay

CEBU, Philippines – Hapsay nga napahigayon ang ika-12 ka tuig nga Gabii sa Kabilin niadtong Biyernes sa nagkadaiyang heritage sites ug museum sa Sugbo nga adunay tema nga “balangay”.

Kini nunot usab sa hugot nga suporta sa Cebu City Police Office, Cebu City Transportation Office ug Traffic Patrol Group diha sa kadalanan nga rota sa kalihukan.

Matud ni Chief Insp. Sandley Sabang, hepe sa Tourist Police Unit, nga pagsugod sa kalihukan hangtud sa nahuman kini sa alas 12 sa tungang gabii, wala sila’y nasugatan nga kakulian.

Hapsay ra sab ang trapiko bisan sa gipatuman nga rerouting nunot sa pagsirado sa pipila ka dalan.

Si Caroline Ballesteros, event director sa Gabii sa Kabilin ubos sa pagpasiugda sa Ramon Aboitiz Foundation Inc. (RAFI), nipadayag sa kalipay nga hapsay ug walay samok ang kalihukan karong tuiga gawas nga adunay gamay nga kakulian sa mga service bus nga gisakyan sa mga partisipante.

Sa 27 ka bus nga gikontrata, 16 lang niini ang nakatunga ug ang 30 ka tartanilya nga giabangan aron himoong service apan ang uban nangawala sa lugar sa kalihukan kay namasahero.

Awhag ni Ballesteros sa mga aduna nay tiket apan wala nakaapil tungod sa uwan nga hiposon kini kay magamit ra sa ubang adlaw aron libre nga makasulod sa mga museums.

Si Ballesteros nitug-an nga Oktubre sa niaging tuig pa nila gisugdan ang pagpangandam inubanan sa ilang mga partners.

Ang upat ka siyudad nga nisalmot sa maong kalihukan mao ang Siyudad sa Sugbo, Talisay, Mandaue ug Lapu-Lapu.

Sa Dakbayan sa Sugbo, adunay 25 ka participating sites, duha sa Dakbayan sa Talisay, ug tag-usa sa Dakbayan sa Mandaue ug Lapu-Lapu.

Samtang gipahibawo ni Ballesteros nga tulo ka tuig gikan karon magselebrar ang Sugbo sa ika-500 ka tuig sukad sa pag-abot ni Ferdinand Magellan diin gikatakdang mobisita si King Felipe VI sa Espanya. (Lara Rose Lasmarias, ug Cherry Ann F. Fornez ug Ericalene S. Tanudtanud /GMR)(BANAT NEWS)