CEBU, Philippines – Nangayo ang Cebu City Peace and Order Program (POP) og P8.2 million supplemental budget alang sa honoraria sa Barangay Peacekeeping Action Team (BPAT) personnel. Matud sa pangulo sa POP, Kevin Christer Paz ang budget proposal alang kini sa buwan sa Hunyo ngadto na sa Disyembre ning tuiga.
Base sa records dunay 196 ka security volunteers ang siyudad ug ang matag usa makadawat og P5,000 binuwang allowance gikan sa siyudad sa Sugbo.
Matud ni Paz nangayo sila sa maong pundo kay ang ilang tinuig nga budget nga P5 milyones mahurot na sa katapusang bahin ning buwana.
Ang Committee on Budget and Finance sa Cebu City Council nagpahigayon na sa ilang unang budget hearing kagahapon sa buntag.
Atol sa budget hearing gipangutana si Paz kon unsay gamit sa ilang grupo. Si Paz miingon nga ang ilang grupo katambayayong sa mga barangay tanod ug kapulisan pagmentinar sa kahapsay ug kalinaw.
Pipila kanila adto i-assign sa mga city-owned building aron mobantay sa seguridad sama diha sa Rizal Public Library sa Osmeña Boulevard, ning siyudad.
Ang maong buhatan nakig-alayon sab sa Cebu City Office for Substance Abuse Prevention (COSAP) aron ipaubos ang mga volunteers sa drug test ug moduso gyud sila kada adlaw og accomplishment reports nga maoy basehanan alang sa pagpagawas sa ilang binuwan nga allowance.
Gipasabot ni Paz nga ang BPAT dili duplication sa trabaho sa barangay tanod gani mas makadaginot pa ang siyudad niini. Sila gibansay sa kapolisan. (/IBM)(BANAT NEWS)