Mga pantalan sa probinsiya pabutangan og polis
CEBU, Philippines — Giawhag ni Bokal Sun Shimura ang Police Regional Office-7 ug Cebu Provincial Police Office nga magbutang og mga police outpost sa mga pantalan ug sa mga tourist destinations.
Kini human nga sa suway nga pagbanhig sa ilang pamilya niadtong Mayo 13 sa Maya Port sa Lungsod sa Daanbantayan diin kuyog ni Shimura ang iyang ama-ama nga si Mayor Vicente Loot ug tibuok pamilya gikan sa Isla sa Malapascua.
Si Shimura, chairman sa committee on peace and order sa Hunta Probinsiyal, niduso og resolusyon nga giaprobahan sa sesyon kagahapon.
Buot sa bokal nga adunay police visibility 24 oras matag adlaw alang sa seguridad sa lugar. Matud ni Shimura nga gawas nga nabalaka siya sa iyang pamilya ilabi na sa iyang mga anak, nabalaka sab siya sa posibleng epekto niini sa turismo dili lang sa Lungsod sa Daanbantayan apil na sa tibuok lalawigan.
Kini gumikan kay atol sa pagpamusil, adunay mga langyaw sa laing sakyanan sa dagat sa pantalan.
“Unsa na lang feedback nila sa ilang nasud? How safe the Province of Cebu, Daanbantayan and Malapascua is, right now,” matud ni Shimura.
Kung iya pa gipadayon ang iyang privilege speech kagahapon, si Shimura mangutana unta kung nganong walay polis sa pantalan niadtong higayuna.
Iyang nasayran nga gihulipan na ang hepe sa lungsod human sa maong insidente. (BANAT NEWS)
- Latest
