CEBU, Philippines – Subo nga balita alang sa Bando Osmeña Pundok Kauswagan(BOPK) human usa sa ilang mga kaalyado kinsa napili nga pagka-kapitan sa Barangay Duljo-Fatima ang giatake sa kasing-kasing ug namatay kagahapon sa buntag.
Ang namatay mao si Duljo-Fatima Barangay Captain-elect Joel Ycong.
Nagkanayon ang pangulo sa Barangay Affairs Office Joeling Lazarte base sa iyang pakighinabi sa mga tawo nga kauban ni Ycong ilaha kining gitawgan sa telepono apan wala motubag.
Hinungdan nga nanawag ang staff sa anak ni Ycong ug dihang nahibawo nga dili motubag gisaka kini sa taas ug nakit-an na lang si Ycong nga nilagom maong nanawag sila og ambulansiya.
“After nagpadala ‘ta og ambulansiya didto niingon nga namatay kuno mga four hours na daw. Sa ato pa og 11 more or less namatay siya 7:30 or 8 o’clock (PM),” sigon ni Lazarte.
Gani niadtong Martes si Ycong mibisita pa sa buhatan ni Lazarte maong nakurat sila sa nahitabo hasta si Cebu City Mayor Tomas Osmeña dihang iyang gipahibawo sa gidangatan sa kapitan.
Subay niini, ang Election Officer sa Commission on Elections Cebu City South District Atty. Anna Fleur Gujilde miingon ma-apply ang rules of succession sa maong hitabo.
“Ang mahitabo ana it will be now succession so ang first councilor maoy mahimong kapitan kay na-proclaim naman sila as the winning candidates so ang first councilor maoy mahimong kapitan then mabakante naman ang council so mag-recommend sila kung kinsa ma- appointed as replacement kibali sa usa sa council kay makuwangan naman pud sila and then it will be appointed by the Mayor,” pasabot ni Gujilde.
Ang first councilor sa Barangay Duljo-Fatima mao ang kanhi kapitan nga si Elmer Abella nga sakop sa oposisyon.
Si Abella miingon nga wala sila magdahom nga ingon niini ang mahitabo ug kini midugang nga managhigala ug kompare silang duha ni Ycong bisan og kontra partido sila sa politika.
Ang napiling kagawad nga si Weng-Weng Abelgas miingon nga nagpaabot unta sila kagahapon sa buntag apan nahibulong sila nga way motubag sa telepono niini.
Unang higayon unta karon ni Ycong nga molingkod isip kapitan, human natapos na ang termino niini isip konsehal sa barangay.(Rowena D. Capistrano/IBM)(BANAT NEWS)