22 ka kandidato sa SK na-disqualified
CEBU, Philippines – Gikatahong adunay 22 ka kandidato isip Sangguniang Kabataan chairman ug councilors sa probinsiya ug siyudad sa Sugbo ang na-disqualified sa milabay’ng eleksiyon sa SK ug barangay ug nahatagan na og omnibus order.
Base sa report sa Comelec sa probinsiya ang nahisgutang mga mikandidato underage, overage ug dili rehistrado diha sa barangay diin sila mikandidato.
Base sa natala sa Comelec sa probinsiya ang mga SK chairman ug councilors nga na-disqualified ug aduna na’y omnibus order mao ang mga barangay nga gikan sa lungsod sa Medellin, Balamban, Compostela, Dalaguete, Moalboal, Dumanjug, San Fernando, Santander, mga dakbayan sa Lapu-Lapu, Talisay, Toledo ug Sugbo.
Matud ni Atty. Ferdinand Gujilde, Cebu Provincial Election Officer ang omnibus order nagmando sa election officer nga dili iproklamar ang kandidato nga na-disqualified apan kong naproklamar na isuspenso ang proklamasyon niini aron dili makalingkod.
Ang first councilor ang molingkod isip SK chairman ug ang na-disqulified nga kandidato kong dili pa final ang iyang disqualification pwede kining moduso og motion for reconsideration ngadto sa Comelec.
Gipasabot usab ni Gujilde nga ang mga kandidato isip SK chairman nga na-disqualified apan walay kontra mabakante ang position niini ug ang first councilor ang makalingkod.
Ang mga kandidato nga nidaog moagi og mandatory training nga pagahimuon sa Department of Interior and Local Government (DILG) human sila maproklamar ug sa dili pa sila molingkod.
Nunot niini, giawhag ni Gujilde ang mga kandidato nga midaog nga manangtang na sa ilang campaign posters. (/BDB)(BANAT NEWS)
- Latest
