CEBU, Philippines – Nabuak ang nawong ug hapit naputol ang liog sa usa ka 41-anyos nga lalaki human kini gitadtad sa wala mailhing lalaki samtang natulog sa usa ka lantay daplin sa karsada sa Barangay Doldol, Dumanjug kagahapon sa kaadlawon.
Ang biktima giila sa Dumanjug Police Station nga si Francisco Montemayor, residente sa maong dapit.
Si Senior Police Officer 1 Samuel Casipong, imbestigador sa maong kaso, niingon nga nakaplagan na lang sa mga manguliay na unta nga mga election volunteers ang biktima nga nagkadugo hinungdan nga gisumbong dayon kini sa mga awtoridad.
Halos maputol na ang liog sa biktima, nagusbat na ang baba, nigawas ang dila ug naguba na ang ngipon diin sumala pa sa maong polis nga adunay dakung kalagot ang naghimo niini.
“Walay signs of struggle (ang biktima). Plastar pa kaayo siyang nakahigda unya iyang kamot nagbitay pa,” matud ni Casipong kinsa nibana-bana nga gipatay ang biktima alas 12 sa tungang gabii hangtud ala una sa kaadlawon sa adlaw na nga Martes.
Pangagpas sa polis nga posibleng sundang ang gigamit sa krimen base sa mga inagian sa samad.
Base sa inisyal nga imbestigasyon ni Casipong, gabii sa adlaw’ng Martes giingong nag-inom ang biktima uban sa igsuong lalaki ug usa ka higala sa tindahan atbang sa lantay diin napalgan si Montemayor.
Alas 10 sa gabii nanira ang tindahan ug nahuman sa pag-inom ang tulo ug nag-iyahay na og uli ang igsuon ug ang kauban samtang ang biktima nilabang ra gikan sa tindahan ug nihigda sa lantay.
Giingong wala na lang panumbalinga sa igsuon sanglit bisan asa ra gyud mohigda ug matulog ang biktima kun mahubog na.
Naninguha ang kapolisan nga masubay ang pat-ak sa dugo gikan sa hinagiban nga gigamit apan pakyas sila hinungdan nga nakapangagpas ang maong imbestigador nga gitrapohan sa mamumuno ang dugo aron walay tinulo nga masubay. Ang polis aduna nay gidudahang tawo nga posibleng responsable sa krimen kinsa gikatahapang adunay dakong kaligutgot sa biktima. (/GMR)(BANAT NEWS)