CEBU, Philippines — Naugdaw ang napulo ka balay nga nahimutang sa Suson Compound sa Barangay Labogon, Dakbayan sa Mandaue nga gialarma sa buhatan sa kabomberohan alas 2:40 ang takna kagahapon sa hapon. Si Mardione Aligway sa Bantay Mandaue nga nahinabi sa Banat News miingon nga nadawat ang alarma alas 3:14 ang takna sa hapon ug daling gibutang sa task force alpha kay ang kabalayan ginama sa light materials.
Matud pa ni Aligway nga base sa pasiuna nga pakisusi sa Mandaue City Fire department nagsugod kini sa panimalay sa usa ka Titing Suson. Gawas sa mga balay naapil og kaugdaw ang usa ka bodega. Wala say nakalas o naangol sa maong hitabo. Ang kabomberohan naghimo pa og dugang imbestigasyon. (BANAT NEWS)