CEBU, Philippines — Nagkatag ang mga sobre nga gisukipan og sample ballot ug kwarta sa tawong nanghatag niini nga dalidaling misibat didto sa barangay Balud, lungsod sa San Fernando niadtong Sabado sa hapon sa dihang nangabot ang mga polis.
Matud ni PO3 Jose Claire Palagtiosa, nakadawat sila og sumbong nga adunay namalit og boto didto sa maong lugar hinungdan nga ilaha kining gisusi.
Apan sa ilang pag-abot midagan ang maong lalaki ug gibuhian ang mga dala niining 63 ka mga puti nga short envelop nga sa ilang pagsusi sa sud , sample ballot sa Team Enad ug adunay gisukip nga P40 matag sobre.
Ang usa sa mga unang miresponde nga si PO2 Roque Villaceran Jr., miingon sa Banat News duha hangtud tulo ka mga lalaki ang giingong nangapod-apod sa maong sobre.
“Amo na ning gi-coordinate sa COMELEC (Commission on Elections) unya maghuwat lang mi if unsay ilang i-suggest nga tukmang buhaton,” matud pa ni Palagtiosa.
Niining pagsuwat, matod pa ni Villaceran nga wala pa miduol sa ilang estasyonan ang mga Enad aron nga klarohon o limpyohon ang ilang mga pangalan. (BANAT NEWS)