Campaign period malinawon, Comelec andam na para ugma

CEBU, Philippines – Human sa siyam ka adlaw’ng campaign period, andam na ang pwersa sa kapolisan alang sa adlaw sa piniliay ugmang adlawa sumala pa sa tigpamaba sa Police Regional Office-7 nga si Police Supt. Reyman Tolentin.

Sumala pa niya, wala silay namatikdang Election Related Incident (ERI) atol sa kampanya.

"All systems go. On the Green (na ta). Security preparations in place and no recorded election related incidents as of the moment," sigun pa sa maong tigpamaba.

Sumala pa niya dako og natabang sa pagpahapsay sa campaign period kining gihimong mga peace covenants tali sa mga magpapili karong eleksyon.

Base sa gipagawas nga datos sa Regional Public Informations Office, nakahimo sila og 81 ka peace covenant signing, 74 ka forum ug meeting kauban sa mga kandidato, 18 ka mga unity run and walks, siyam ka peace caravans ug 44 ka mga peace dialogue.

Sugod unyang kaadlawon ipatuman na ang liquor ban ug uban pang mga balaod panahon sa eleksyon.

"Liquor ban, campaigning like pagpanghatag og balota labi na kay naay pakapin nga kwarta, that would be a violation of the election code," si Tolentin miingon.

Giawhag nila ang publiko pagsumbong sa mga otoridad kon ganing adunay mamalit og boto.

Gipanghatag na kagahapon diha sa Plaza Sugbo ug Commission on Elections ang mga gamitonon sa eleksyon ugmang adlawa.

Kini naglangkob sa mga ballot boxes, voters lists ug listahan sa mga moserbisyo inig adlaw sa piniliay samtang kagahapong adlawa gisugdan na ang pagpanglimpyo sa mga lawak-saringan diin himuon ang   pagbotar.

Mipahimangno si Commission on Elections Regional Director Veronico Petalcorin ngadto sa mga kandidato, mga botante ug sa mga moserbisyo sa eleksyon nga sundon gyud ang mga lagda sa Omnibus Election Code.

Ginadili na ang pagpangampanya sugod karong adlawa hangtud ugma sa piniliay ug gidili ang pagsuot og campaign shirts.

"They must be guided with the code of righteousness because if they're doing what is right, they can never go wrong.

So dili sila mahadlok, mabalaka, basta magbuhat sila sa sakto, naa kanunay ang COMELEC manalipud kanila unya tagaan sila og grasya sa Ginoo nga magbuhat sila’g katarong." (Katrina Aguirre, CNU Intern/IBM)(BANAT NEWS)