CEBU, Philippines – Usa ka priso sa Cebu City Jail ang nag-amok ug nakadunggab og upat ka mga priso hinungdan nga napusilan patay sa mga jail guards niadtong Sabado sa kaadlawon.
Ang nakalas naila nga si Glen Albores, 32, taga Purok 1-A Barangay 23, Butuan City, dunay kasong arson nga nagung-ong karon sa Regional Trial Court Branch 10.
Samtang ang naangol mao sila si Christian Saballa, 23, dunay kasong attempted robbery with homicide;Marvin Gimpeso, 33, may kaso sa ilegal nga drugas; Benji Pijo, 39, may kasong murder ug robbery ug Richard Gaviola, 30, dunay kaso sa drugas.
Matud pa ni Jail Supt. Renante Rubio, Jail Warden sa Cebu City Jail may nahitabong komosyon sa Ward 4 diin mahimutang ang mga bug-at og kaso hinungdan nga miresponde didto ang mga gwardiya.
Naabtan pa nila si Albores nga nanunggab sa iyang mga kauban ug sa dihang ilang gibadlong miatraka kini sa mga guwardiya padung sa service gate hinungdan nga gipasalbahan apan wala mopatuo hinungdan nga napusilan kini sa dughan ug namatay.
Ang duha sa mga nadunggaban gidala sa tambalanan , usa kanila ang kritikal samtang ang laing duha diha ra sa infirmary sa prisohan gitambalan.
Usa ka improvised icepick nga ginama sa asero nga wire ang nakuha gikan sa napatay nga priso.
Tungod sa nahitabo, gibaharan ni Rubio ang tanang mga priso nga suspensuhon ang ilang mga dalaw kon dili nila i-surrender ang tanang mga mahait ug tinalinsang mga hinagiban.
Wala dangti og pipila ka minutos gikan gipahibalo, daghang mga makamatay nga hinagiban ang gi-surrender sa mga priso nga dili momenus usa ka gatos ka buok.
Ang maong prisohan adunay kapin tres mil ka mga inmates ug nagduda si Rubio aduna pay mga tinagoang mahait nga hinagiban nga wala gihapon gi-surrender sa mga inmates.
Pagkaburyong maoy gituohan ni Rubio nga hinungdan nganong nabuhat kadto ni Albores kay iyang nasayran nga duha na kini ka tuig nga walay dalaw.
Tungod niini ang deputy mayor on police matters councilor Dave Tumulak, niawhag sa mga pamilya sa mga piniriso nga bisitahon gyud ilang kabanay aron makaminos-minos kini sa ilang kamingaw sulod sa prisohan. (Shaira Gwen T. Laluna, CNU Intern/IBM)(BANAT NEWS)