CEBU, Philippines – Aduna unyay kausaban nga himuon sa rota sa Bus Rapid Transit (BRT) kon mahinayon ang pagtukod og monorail nga proyektong giduso sa Philtram Transportation Consortium Inc. (PTCI) sa Metro Cebu Monorail.
Sa pagkakaron adunay gihimong pagtuon alang sa giduso nga monorail project, apan dili mawagtang ang BRT kon kini mahinayon kondili magdungan sila sa pagdagan apan aduna lamang gamay nga kausaban sa rota niini.
Matud ni Jose L. Guardo, Jr., pangulo sa technology architect sa PTCI nga ila kining himuong Smart BRT nga inabagan sa teknolohiya sa Huawei.
Gipaabot nga mas daghang mga Sugboanong sumasakay ang maserbisyohan niini tungod kay ang maong duha ka modernong transportasyon anha man manukad gikan sa Minglanilla nga moabot sa Mandaue City.
Dugang pa niya wala kaayo manginahanglan og road right of way acquisition ang monorail tungod kay anaa ra man kini sa ibabaw mag-agi.
Una nang gipahibalo sa PTCI nga modonar ang China og tulo ka electric BRT sa Dakbayan sa Sugbo ug ang Department of Transportation (DOTr) mao’y mo test-run ug mohatag og training sa magdala niini.
Ang maong monorail project paluyohan sa China Railway Engineering Corp. (CREC). Gamiton sa PTCI ang Bombardier Innovia 300 nga giugmad didto sa Canada ug Germany apan didto himoon sa China Railway Rolling StockCorp. (CRRC)- Puzhen Bombardier Transportation System (PBTS).
Gipaabot na lang sa Philtram ang Original Proponent Status gikan sa DOTr ug ingon man ang kontrata nga build-transfer-operate ubos sa private public partnership (PPP) ug humanon kini pagtukod sud lang sa duha ka tuig. (Ericalene Tanudtanud, UV Journalism Interns/IBM)(BANAT NEWS)