CEBU, Philippines – Patay na nga nakaplagan ang usa ka call center agent sulod sa iyang boarding house sa Sitio Anagan, Apas, Dakbayan sa Sugbo niadtong Martes sa gabii.
Si Alex Jabinal, 33, call center agent sa Accenture, nakaplagan sa caretaker sa balay nga iyang gipuy-an nga wala nay kinabuhi sulod sa iyang kwarto.
Matud sa caretaker nga si Amor Regala nga Martes sa gabii naabot ang amigo ni Jabinal nga si Ronison Algano nga nangita sa biktima.
Gisangpit si Jabinal sanglit nagsiga ang suga apan gitrangkahan ang pultahan apan wala nitubag hinungdan nga gikatkat ang kwarto ug maoy napalgan ang padulong na madugta nga patay’ng lawas.
Sa imbestigasyon sa Mabolo Police Station walay sinyales nga adunay foul play nga nahitabo.
Samtang nakaplagan sab ang patay'ng lawas sa usa ka lalaki nga giingong adunay sakit sa pangisip sa Sitio Libaong, San Isidro, Asturias niadtong Miyerkules sa hapon.
Matud ni PO1 Rene Vizcayno sa Asturias Police Station nga ang iyaan niini ang niila sa patay’ng lawas nga si Wilson Albasolo Purisima, 49, pinaagi sa brown t-shirt ug maong nga shorts.
Si Purisima taga Looc Norte, Asturias kinsa natala nga missing niadto pang buwan sa Marso. ( Pegeen Maisie M. Sararaña, CNU Interns/GMR)(BANAT NEWS)