Planta sa supplier sa MCWD gipahunong sa DOLE

CEBU, Philippines – Gipahunong sa Department of Labor and Employment ang operasyon sa treatment plant sa Cebu-Manila Water Development, Inc. sa Cantumog, Carmen nga maoy supplier sa tubig sa Metropolitan Cebu Water District (MCWD).

Kini human usa ka trabahante nga si Renato Peroso ang naputlan sa tiil human aksidente nadakin-as ug napasok ngadto sa submersible water pump nga gigamit sa paglimpyo sa lagon niadtong Abril 30.

Matud ni DOLE-7 Director Alvin Villamor nga nadawat sa CMWD ang stoppage order niadtong Miyerkules human nasuta sa imbestigasyon ang mga kasaypanan ug kalapasan sa kompaniya.

Sigun pa ni Villamor nga dili sila gusto nga aduna pay laing susamang panghitabo maong ila dayon gipahunong ang operasyon.

Nakig-alayon sab ang DOLE sa Employees’ Compensation Commission nga tapik sa ilang ahensiya alang sa dugang matabang niini ngadto sa biktima. (Cherry Ann F. Fornez ug Ericalene S. Tanudtanud, UV Journalism Interns/GMR)

Di pareho og apelyedo makapuli na sa kandidato

Giklaro ni Atty. Lionel Marco Castillano, provincial election supervisor, nga pwede mailisan ni bisan kinsa nga rehistradong botante ang usa ka kandidato nga namatay sa wala pa ang eleksyon ug sa adlaw na sa eleksyon.

Matud ni Castillano nga kini sukwahi sa nakalabay nga mga resolusyon sa Commission on Elections.

Ang naandan mao nga kinahanglang pareho ang apelyedo sa mopuli nga kandidato apan sa bag-ong pamaagi, pwede na bisan kinsa nga rehistrado.

Ang mga boto nga makuha sa namatay nga kandidato iphon kini pabor sa nihulip. (CNU Intern/GMR)(BANAT NEWS)