‘Black propaganda’ gisaway ni Ayuman
CEBU, Philippines – Gisaway ni Apas Barangay Kapitan Ramil Ayuman ang post ni Cebu City Mayor Tomas Osmeña sa Facebook nga iya gihulagway nga black propaganda. Matud ni Ayuman nga desperado nga lakang ang gihimo ni Osmeña sa pagpaapod-apod og listahan sa mga kapitan nga gipangkiha sa giingong pagpangawat og kwarta sa gobiyerno.
Si Osmeña sa iyang bahin niingon nga igo lang siya ni-report sa katawhan kun unsa kalimbongan ang ilang mga barangay kapitan ug sila na ang moesplikar ngadto sa mga konstituwente.
Gani gihagit ni Osmeña ang mga kapitan nga mokiha kun sa ilang pagtuo black propaganda ang iyang gihimo.
Si Ayuman sa iyang bahin niingon nga sa saktong panahon na siya mokiha batok sa mayor.
Si Ayuman nipasangil sa hepe sa General Services Office, Ronald Malacora nga maoy nangapod-apod sa mga listahan.
Kini ang hinungdan nga nakapangutana si Malacora kung diin kini ni Ayuman nga kasayuran.
Si Malacora sab niingon nga iya kining ikonsulta sa iyang mga abogado kun unsay legal nga lakang nga iyang mahimo sa pasangil ni Ayuman. (/GMR)(BANAT NEWS)
- Latest
