CEBU, Philippines – Dili mominus 280,000 ka pasahero ang gibanabana nga manakay sa monorail matag adlaw nga moagi sa Fuente Osmeña Rotunda ug sa pantalan base sa pagtuon sa Philtram Transportation Consortium, Inc. (PTCI) nga niduso sa maong proyekto.
Samtang gihimug-atan sa PTCI nga mahimong mahiusa ang giplanong Metro Cebu Monorail sa proyektong Bus Rapid Transit (BRT).
Ang Metro Cebu Monorail Project gibana-banang mogasto og P63 bilyones.
Matud ni Domingo So Peñaloza, pangulo sa PTCI, nga natapos na ang feasibility study ug andam na kining iduso ngadto sa Department of Transportation (DOTr).
Base sa pagtuon, dili mominus sa 25 mil ang mosakay ug manaug sa estasyon sa Fuente ug sa Mango Avenue samtang 26 mil sab sa may SM City Cebu.
Sigun sa PTCI, bisan maminusan og 10 porsyento ang mga mananakay sa monorail sa may N. Bacalso Avenue gikan sa Bulacao padulong sa eskina V. Rama sa unang duha ka tuig apan mabawi ra kini sa dugang unyang manakay. (Ericalene S. Tanudtanud, UV Journalism Interns/GMR)(BANAT NEWS)