CEBU, Philippines — Giatiman sa mga kawani sa City Social Welfare and Services sa Dakbayan sa Mandaue ang puya nga gibanabana nga kapin na sa usa ka semana nga nahimugso ug napalgan nga gilabay sa dump site sa Barangay Umapad sa maong siyudad kagahapon sa buntag.
Si Jessie Perez, officer-in-charge sa maong buhatan, niingon nga ilang hatagan og pag-atiman ang maong bata nga lalaki nga napalgan nga gisul-uban na og sapot ug gisulod sa plastic bag.
Si Police Officer 2 Juanito Libres sa Presinto 5 sa Mandaue City Police Office (MCPO) niingon nga ang drayber sa multicab nga gi-parking sa maong dapit nga si Angelito Entis, 48, maoy nakakita sa bata dihang padulong na unta siya magmaneho sa iyang sakyanan.
Giingong nakadungog og hilak sa bata si Entis hinungdan nga dali niya kining gikuha ug nagpahibawo ngadto sa buhatan sa kapolisan ug nakig-alayon sa CSWS.
Dugang ni Libres nga mohimo sila og pakisusi sa palibot sa maong dapit sa pamasin nga ang inahan sa maong bata anaa lang nagpuyo duol sa maong dapit. GMR (BANAT NEWS)