Bag-ong board sa Newscoop nanumpa

CEBU, Philippines — Pormal naka panumpa sa ilang katungdanan ang bag-ong mga opisyal sa Cebu Newsworkers Multi-Purpose Cooperative. Kini atol sa sinemanang 888 News Forum sa Marco Polo Plaza Cebu kagahapon kinsa ang nipahural mao ang negosyante nga si Glenn Soco, ang chairman sa infrastructure development committee sa Central Visayas Regional Development Council.

Ang naglangkub sa bag-ong Board of Directors mao sila si Atty. Elias Espinoza isip chairman, Marlinda Angbetic Tan isip vice chairman ug ang mga sakop mao sila si Gregg Rubio, Elias Baquero, Fred Languido, Gabby Malagar, Joseph Elvir Tubilan, Divine Ngujo, Tonee Despojo, Jovy Gerodias ug Oscar Pineda.

Si Espinoza ang nihulip kang Baquero kinsa nahimong chairman sa Cebu Newscoop sulod sa walo ka tuig.

Nipasalig hinoon si Baquero sa iyang hugot nga suporta sa liderato ni Espinoza.

Dugang pa ni Baquero nga karong tuiga pinaagi sa pagtugot sa Board iyang gipaninguha nga makabaton og bag-o ug daku nga opisina ang Newscoop sa Cebu Province Association of Accredited Cooperatives (CPAAC) Building duol sa buhatan sa Ombudsman. Sigun pa niya nga siya sab ang modumala sa Coop Life Mutual Benefit Services (CLIMBS) Division aron ang tanang miyembro ug komunidad maseguro.

Si Espinoza sa iyang bahin nanawagan ilabi na sa mga sakop sa media nga magpasakop sa Newscoop aron matabangan sa ilang panginahanglanon sa umaabot. (Cherry Ann F. Fornez ug Ericalene S. Tanudtanud, UV Journalism Interns/GMR)  (BANAT NEWS)