Planong ‘Chinatown’ gihangop ni Tomas
CEBU, Philippines – Uyon si Cebu City Mayor Tomas Osmeña nga himoon ang downtown area sa siyudad nga Chinatown center. Nagkanayon si Osmeña nga ang maong plano adunay dakong potensyal nga makapalambo sa ekonomiya sa siyudad kon maayo kini pagka-plano.
Si Konsehal Jerry Guardo nagplano nga himoon ang tibuok downtown area og Chinatown center ug magsilbi kining prime commercial district sa mga Sugboanon.
Si Guardo niasoy nga ang pag-umol sa Chinatown center nag-ila sa mga kontribusyon sa mga pribadong sektor ilabi na sa mga adunay kaliwatan nga Intsik.
Matud ni Osmeña nga kung adunay Chinatown sa siyudad wala kini nagpasabot nga dili na pwede mamaligya og mga produkto nga ginama gikan sa laing nasud gawas sa China.
Sumala ni Osmeña nga bisan pa man og lain-laing “town” ang itukod sa siyudad maayo gihapon kini para kaniya sanglit dakong tabang ang matampo niini sa mga Sugboanon ug makahatag kini'g oportunidad sa mga negosyante.
Dugang niya nga daghang economic waves ang niigo sa Sugbo sa niaging katuigan ug usa na niini ang Business Process Outsourcing (BPO) nga gipahimuslan sa kadaghanan karon.
"The BPO is a growing industry, second only to OFWs," matud ni Osmeña. (Erly Ann Alcontin, CNU Interns/GMR)(BANAT NEWS)
- Latest
