CEBU, Philippines – Lakip sa gitun-an ang Lungsod sa Medellin ug Dakbayan sa Bogo nga iapil sa Election Watchlist Areas (EWAs) sa Probinsiya sa Sugbo sumala pa ni Cebu Provincial Police Office Director Edgar Alan Okubo.
Samtang nagpinirmahay og peace covenant ang 532 sa 769 ka kandidto sa eleksiyon sa Barangay ug Sangguniang Kabataan sa Lungsod sa Daanbantayan niadtong Lunes sa buntag.
Apan si Okubo niingon nga ang maong lakang dili kaseguraduhan nga mawala sa EWAs ang maong lungsod.
“Di assurance yun initiatives lang nila yun probably they are all willing to have a peaceful election there pero di yun requirement para mawala sila sa paga-aralan,” matud ni Okubo.
Kahinumduman nga una nang gibutyag ni Okubo nga gitun-an ang Daanbantayan kon malakip ba kini sa EWAs.
Dugang gibutyag sa maong direktor nga lakip sa ilang gitun-an karon ang Medellin ug Bogo human ilang nasuta nga may Intense Political Rivalry (IPR) ang maong mga lugar.
Iyang gitataw nga karong semanaha mahibaw-an ang final nga listahan sa EWAs human sa pagsubay sa kapolisan.
“It’s for assessment purposes if (Bogo and Medellin) may or may not include sa list,” si Okubo niingon.
Karong Mayo 14 na ang Barangay ug SK election lukop nasud. (/GMR)(BANAT NEWS)