CEBU, Philippines — Gitubag sa Bangko Sentral ng Pilipinas (BSP) ang mga kabalaka sa publiko kabahin sa bag-ong mga sinsilyo nga ilang gipagawas.
Matud pa ni Bank Officer II, Hazel Cultura, nga giuna nila og pagawas ang tag singko subay sa kasumaran sa adlaw nga natawhan ni Andres Bonifacio diin ang nawong niini mao ang napatik sa maong sinsiyo niadtong Nobiyembre diin sa mao nilang pagpagawas daghan kaayo ang nireklamo kay anggid sa piso.
Dugang ni Cultura nga naanad ang mga tawo sa mga color coded nga mga kwarta ug maoy rason nga naglibog sila. Tungod usab sa color coded nga mga kwarta ang uban wala nakahibalo kon unsa o kon kinsa ang anaa sa maong sinsiyo kay nagbase ra sila sa color niini.
Ang mga bag-ong sinsiyo adunay security features nga gagamit og labing bag-o nga teknolohiya atol sa paghulma aron malikayan ang mga paghimo og peke.
Matud pa ni Deputy Director Christine Tan, usa sab sa rason nganong naghimo og bag-o nga mga sinsiyo kay mas gamay ang ilang gasto sa paghulma kompara sa karaan kay dako ang gasto tungod sa copper nickel ang gigamit.
Dugang ni Tan nga ang BSP mahimong mousab sa desinyo sa mga banknotes nga sobra lima ka tuig ang panuigon ug sinsiyo nga kapin sa napulo ka tuig ang panuigon base sa Section 57, R.A. No. 7653. (BANAT NEWS)