Senior’s aid ipanghatag karon
CEBU, Philippines — Ipangapod-apod na sa kagamhanan sa Siyudad sa Sugbo ang financial assistance sa mga senior citizens karong adlawa. Ang pangulo sa Office of Senior Citizen's Affairs (OSCA), Lourdes Limpangog, nagkanayon nga sa 80 ka barangay sa siyudad adunay 67,300 ka senior citizens ang makabenepisyo sa financial assistance sa buwan sa Abril.
Kini ang ikatulong higayon nga nanghatag sila sa financial assistance karong tuiga sa tag P1,000 matag buwan.
Ang pagpangapod-apod sa financial assistance mahitabo sa matag barangay sulod lang sa usa ka adlaw sugod sa alas 8 sa buntag hangtud alas 12 sa udto.
Ang mga senior citizens nga dili makakobra sa ilang financial assistance karong adlawa hatagan og 10 ka adlaw gikan karon aron makuha ang ilang kwarta apan adto na kuhaon sa City Treasurer's Office (CTO).
Ang mga senior citizens nga wala malista sa payroll dili gyud mahatagan tungod kay mao kini ang basehan sa pagpanghatag sa ilang financial assistance. Ang mga beneficiaries gikinahanglan nga magdala og original nga ID nga giisyu sa OSCA. (Erly Ann Alcontin, CNU Interns/GMR)(BANATNEWS)
- Latest
