Task group Alicaway gihulma

CEBU, Philippines – Nigama ang Cebu Provincial Police Office (CPPO) og Special Investigation Task Group (SITG) alang sa kasong pagpatay sa konsehal sa San Fernando nga si Alexander Alicaway.

Gipadayag sa direktor sa CPPO, Senior Supt. Edgar Alan Okubo, nga gilangkuban ang SITG sa Provincial Investigation Detection and Management Branch, Criminal Investigation and Detection Group-7, Legal Service sa Police Regional Office-7 ug sa hepe sa kapolisan sa San Fernando.

Matud ni Okubo nga gihimo kini aron sa pagpadali sa pagsulbad sa kaso sa biktima ug pagdakop sa nagpaluyo sa maong krimen.

“Nag-tasking na ang SITG na palawakin pa yung investigation. Last meeting ay nagkaroon na ng division tasking,” sigun ni Okubo.

Usa sa gitutukan nga anggulo sa krimen mao ang politika samtang ang laing duha gipabilin una nga sekreto sa publiko.

Gipusil patay ang maong konsehal sa duha ka wala pa mailhing mamumuno sa Barangay South Poblacion sa maong lungsod niadtong Marso 13 samtang naglakaw gikan sa iyang tindahan sa merkado paingon na unta mopauli sa Barangay Tinubdan. (/GMR)(BANAT NEWS)