Upat ra ka drug rehab centers ang may pagtugot

CEBU, Philippines – Suspek sa pagpanunggab sa mga kauban didto sa usa ka drug rehabilitation center giingong nadala na kaniadto sa Vicente Sotto Memorial Medical Center for Behavioral Science sumala pa sa opisyal sa maong tambalanan.

Si Dr. Rene Obra, pangulo sa maong sentro miingon nga nadala sa ilang buhatan si Archie Abastillas, ang gitumbok nga suspetsado sa pagpanigbas sa tulo ka mga kauban niini sa Halfway House sa may Providence Street, Uldog, Barangay Cansojong Dakbayan sa Talisay, Huwebes sa kaadlawon.

Matud pa ni Obra, base sa record nasud si Abastillas sa ilang pasilidad niadtong Oktubre 21, 2014 ug pagkatuig 2016 nagpa check up kini apan human niadto wala na mobalik.

Apan niadto lang Abril 17, 2018 gidala kini sa usa sa mga rehabilitation agent diha sa ilang buhatan.

Sumala pa ni Obra importante kaayo ang pagtumar sa tambal kon ang usa ka tawo nagpaubos sa drug rehabilitation ug nakasinati na og mga depresyon ug dili mahimutang ug kinahanglan sila kanunay ma-monitor og doktor.

Sumala pa niya, kasagaran sa mga mogamit og drugas nga kalit-kalit moundang makasinati og gitawag nga withdrawal depression.

Dako ang pagtuo ni Obra nga basin nakasab-an si Abastillas hinungdan nahiubos. Matud pa niya kadtong dunay mga ‘anxiety’ mubo ra kaayo og pasensiya ug manggidudahon bisan walay basehanan.

Walay gibasol si Obra sa maong panghitabo  ug iyang gipaabot ang pahasubo sa mga pamilya sa mga nangamatay. Apan nanghinaut siya nga imbestigahan ang maong panghitabo aron pagsusi kon aduna pay laing kaubang nagpadagan sa maong after care facility ug dili lang si Ervyn Ian Enilo.

Giawhag ni Obra ang mga pamilya nga adunay mga sakop nga adunay problema sa panghunahuna sa pagpasusi niini tungod kay dili man tanan dad-on sa ilang buhatan mga nalisoan na og pangisip, sumala pa niya matambalan pa kon sayo-sayo maatiman.

Samtang si Dr. Guy Perez, OIC- Regulations Licensing and Enforcement Division Chief nitug-an nga sila sa Department of Health aduna lamang upat ka mga accredited nga rehabilitation centers nga nakapasar sa tanan mga rekisitos.

Kini mao ang sa Cebu North General Hospital Chemical Dependents Control and Rehabilitation Center, Department of Health Treatment and Rehabilitation Center Argao, House of Hope Inc., ug ang Roads and Bridges to Recovery Cebu Branch.

Dugang pa ni Perez, ang magpabarug og rehab center kinahanglang makakompleto sa mga rekisitos ug may pagtugot sa DOH, ug ang maong upat ka pasilidad lang ang nahatagan nila og accreditation.

Gitug-an ni Perez, sa pagkakaron wala pa silay napasakaan og kaso nga mga rehab centers nga nag-operate nga walay lisensya tungod kay wala silay nadawat nga reklamo.  Sa pagkakaron gitutokan sa DOH ang mga rehabilitation centers ug wala pa kaayo sa mga after care nga programs.

Ang tigpamaba sa Police Regional Office-7 nga si Police Supt. Reyman Tolentin ug ang tigpamaba usab sa Philippine Drug Enforcement Agency-7 nga si Leia Albiar mipadayag sab nga di sila maoy mohatag og accreditation sa mga drug rehab centers kondili ang  Department of Health ra gyud.

Apan ang pangu sa kapulisan sa Siyudad sa Talisay gusto nga pahibaw-on gyud sila sa mga tawo nga gustong magtukod og drug rehabilitation center o mga pasilidad nga susama niini.

Si Supt. Marlu Conag nagtuo nga walay permiso ang biktima nga si Ervyn Ian Enilo paghimo adtong iyang pasilidad tungod kay hasta ang tag-iya sa giabangan nga balay wala mahibawo nga mao na diay ang iyang plano sa pag-abang.

Sumala pa ni Conag, si Enilo usa ka drug dependent kaniadto apan sa pagsulod niya sa aftercare program sa siyudad sud sa pito ka buwan ug nakahuna-huna siya nga mohimo sa iyang kaugalingon center.

Apan sa pagsugod niya sa ilang rehab center nasukmatan niini ang suspek nga si Abastillas tungod sa paglapas sa curfew. Si Abastillas nasuko hangtud nga sa pagkatulog nila ni Enilo uban sa laing kauban nga sila si Lendon Corpeso ug Thomas Woodruff gitagsa-tagsa sila sa pagtigbas.

Nakadagan si Corpeso ug nakapangayo og pakitabang sa silingan hinungdan nga siya nakalingkawas sa kamatayon. Si Enilo ug Woodruff ang namatay ug naglaslas pud sa iyang pulso si Abastillas hangtud nga namatay.

(Camille Pateres ug Gabriel Bonjoc/IBM)(BANAT NEWS)