Kagawad sa Calamba nabalaka

CEBU, Philippines – Gihangyo ni Calamba Barangay Kagawad Eldy Ygonia ang Commission on Elections (Comelec) nga bantayan ang ilang barangay tungod sa nahitabo sa ilang panimalay niadtong Abril 17, 2018 sa gabii.

Matud niya, adunay misulod sa ilang panimalay nga mga armadong tawo nga nagtaptap, nagsuot og helmet, nag-shorts ug ang trabahante sa bakery sa igsuon sa iyang asawa nga nanglaba gitionan og armas.

Giingong gipangutana ang ilang trabahante kon asa siya (Ygonia). Matud sa konsehal natulog na siya anang orasa.

Ang pag-umangkon sa asawa sa konsehal sa pikas nga balay migawas ug nangutana unsay nahitabo apan giingong milakaw ang maong mga lalaki ug misakay og motorsiklo palayo.

Matud ni Ygonia, bisan ang kauban niyang kagawad nga si Atty. Noel Bacalla gihulga usab kay gisuwatan og “D’Brain” ug dunay letrang X ang gate sa balay niini nianang gabhiuna gihapon. “Dili man gud kay ako ra, akong mga kaubang konsehal na-threat naman sad gud unya murag tingali sad election related sad ni siya ba. Dili ta ka pin-point man gud kay ga-helmet, gataptap di ta makaila,” sigon ni Ygonia.

Si Ygonia anaa na sa katapusang termino ug wala na kini plano pa nga modagan karong eleksyon. Tungod niini, niduol siya kang Konsehal Dave Tumulak, Chairman sa Committee on Public Order and Safety labot sa maong hitabo. Si Tumulak mitawag kang Atty. Anna Fleur Gujilde, Election Officer sa Cebu City South District ug mipahibawo kalabot niini.

Gipaabot nga magtagbo ang konsehal, Comelec ug PNP aron tukion ang problema nga gikonsiderar ni Tumulak may kalabutan sa eleksyon. (/IBM)(BANAT NEWS)