CEBU, Philippines – Giawhag sa Commission on Elections (Comelec) sa probinsiya sa Sugbo ang mga munisipyo ug dakbayan nga magpahulam sa ilang mga sobra nga ballot box ngadto sa mga local government units nga kulang niini.
Kini human nga ang lungsod sa Dumanjug ug Cordova nanghulam og ballot box ngadto sa dakbayan sa Mandaue nga gibalibaran usab sa city treasurer sa siyudad nga si Atty. Regal Oliva tungod kay igo ra ang ilang ballot boxes sa ilang mga clustered precincts sa dakbayan.
Si Atty. Lionel Marco Castillano, provincial election supervisor nagkanayon nga adunay mga ballot box niadtong 2013 nga eleksiyon nga mamahimong habwaan ug limpiyohan aron nga magamit pa.
Si Castillano nagkanayon nga ang ulohang buhatan sa Comelec dili na kini mopadala og dugang nga ballot boxes tungod kay dili na kini gusto nga mogasto pa hilabina kong mamahimo pang magamit ang mga karaan.
Dugang sa election supervisor nga katong mga munisipyo nga gustong mohulam og ballot box angay usab nga mopadala na lang kini og tawo aron nga mao mismo mohabwa sa sulod sa mga ballot boxes gikan sa ilang hulman nga lungsod ug isulod na lang kini sa sako.
"Magsinabtanay lang ta. Kinahanglan man na gamiton. Siguro kaning mga municipality nga mangayo they’ll help Mandaue City sa pagpanghabwa", awhag ni Castillano.
Si Castillano nipahimangno usab ngadto sa mga municipal ug city treasurer nga angay mopahulam sa ilang mga ballot box sanglit giimbentaryo man nila kini.
"Atong huna-hunaon nga as custodian, imo nang tulobagon kong nawala ang property so naa gyu’y tulobagon kay dapat iimbentaryo na nimo.
Naa bayay record ang Comelec kong pila tanan nadawat nimo" dugang sa provincial election supervisor.
Ang mga treasurer nga dili magpahulam mamahimong mag-atubang og kasong administratiba ug kalapasan sa anti-graft and corrupt practices act. (/BDB)(BANAT NEWS)