CEBU, Philippines – Nitahan niadtong Lunes sa gabii ang 28-anyos nga construction worker kinsa suspek sa pagdunggab patay sa kauban niini sa trabaho niadtong Abril 9 human giingong nakonsensiya. Ang suspek giila nga si Jomarie Alberto, taga La Libertad, Negros Oriental, samtang ang biktima mao si Leonardo Anito, 48, taga Yati, Lungsod sa Liloan.
Ang hepe sa Cebu City Police Office-Investigation Detection and Management Branch, Supt. Ryan Devaras, niingon nga kauban ang duha sa usa ka construction site sulod sa usa ka unibersidad sa Lahug, Dakbayan sa Sugbo.
Gidunggab sa suspek gamit ang 12 pulgadas nga kutsilyo human giingong nahubog nga nagmaoy ug gisikad-sikaran sa biktima si Alberto.
“Gisikad-sikaran ko niya. Gibalikbalikan ko, nakapatay kuno na og taga Manila maong nakuyawan ko. Nadunggaban nako sa dughan,” angkon ni Alberto.
Niangkon si Alberto nga pagkahuman sa krimen, nisibat ug nipauli siya sa ila apan human sa pipila ka adlaw giingong padayon siyang giusig sa iyang konsensiya.
Nitahan siya sa kapitan ug konsehal sa ilang barangay kinsa maoy nihatud kaniya sa Guihulngan City Police Station niadtong Lunes sa gabii.
Kagahapon sa buntag naabot sa Dakbayan sa Sugbo si Alberto inubanan sa mga polis sa Guihulngan ug gitanggong ug gipasakaan og kasong murder sa CCPO sanglit sa Dakbayan sa Sugbo nahitabo ang krimen. (Jomelyn B. Largado, CNU Intern/GMR) (BANAT NEWS)