CEBU, Philippines — Ang Provincial Veterinary Office (PVO) aduna na’y bag-ong ekipo nga mag-detect kon positibo ba o dili sa rabies ang usa ka iro.
Matud ni Dr. Mary Rose Vincoy, provincial veterinarian nga ang maong ekipo mao ang "direct fluorescent antibody test" (DFAT) nga anaa na karon sa Provincial Diagnostic Laboratory sa Kapitolyo.
Ang maong ekipo napalit kini niadto pang bulan sa Disyembre sa miaging tuig ug nagkantidad og sobra sa P1 milyon.
Kaniadto aron mapiho kong aduna ba’y rabies ang usa ka iro kinahanglang magpadala og sample o ulo sa patay nga iro nga gituohan adunay rabies ngadto sa Regional Animal Disease Diagnostic Laboratory (RADDL) sa Department of Agriculture (DA) apan karon direkta nang masuta sa PVO kong ang usa ka iro nga nakapaak aduna ba’y rabies tungod kay ang Kapitolyo aduna na’y kaugalingong ekipo.
Hinuon matud ni Vincoy nga dili pa kini hingpit gyud nga magamit hangtod nga walay tawo o authorized personnel nga mo-operate niini.
Matud usab ni Vincoy nga si Dr. Veda Mangilimotan ug usa nila ka medical technologist ang gipaubos na og training aron maoy maka-handle sa maong ekipo. (/BDB)(BANATNEWS)