CEBU, Philippines — Gimandoan sa Malacañang si presidential adviser sa legislative affairs Secretary Adelino Sitoy nga mo-obserba sa mga pamaagi sa Consultative Committee (ConComm) sa pagtuki sa 1987 Constitution.
Si Executive Secretary Salvador Medialdea pinaagi sa sulat nga adunay petsa nga Abril 4, 2018 nagpahibalo sa retirado nga Supreme Court Chief Justice Reynato Puno, chairman sa ConComm sa pagkatudlo kang Sitoy.
Matud ni Medialdea isip observer, si Sitoy pasumitihon kini og written comments ug observation ngadto sa Office of the Executive Secretary.
Ang buhatan sa presidential spokesperson, Sec. Harry Roque ug head sa presidential communications operations office, Sec. Martin Andanar gipadalhan usab og kopya sa maong sulat.
Nunot niini, gipirmahan ni Presidente Rodrigo Duterte ang Executive No. 10 niadtong Disyembre 7, 2016 nga nagmugna sa ConComm nga gilangkuban sa 25 ka miyembro.
Ang maong mga miyembro mga veteran, kanhi opisyal sa gobiyerno, abogado ug academicians kinsa gilangkuban nila ni kanhi Senate President Aquilino “Nene” Pimentel Jr., Victor dela Serna, Ranhilio Aquino, Virgilio Bautista, Rodolfo Robles, retired Supreme Court Associate Justice Antonio Eduardo Nachura, Julio Teehankee, retired SC Associate Justice Bienvenido Reyes, Edddi Mapag Alih, Edmund Tayao, Ali Pangalian Balindong, Laurence Wacnang, kanhi Integrated Bar of the Philippines president Roan Libarios, Reuben Canoy, Arthur Aguilar, Susan Ubalde-Ordinario, Antonio Arellano,ug Randolph Parcasio.
Sila ang gitahasan sa pagsusi sa 1987 Constitution sulod sa unom ka bulan gikan sa adlaw nga kini gi-convened.
Niadtong buwan sa Pebrero niining tuiga pormal nga gisugdan sa consultative body ang pagsusi sa 30-anyos nga charter sa nasud.
Gihisgutan nila kong unsa nga probisyon sa 1987 Constitution ang angay amendahon lakip ang matang sa sistema sa politika nga kinahanglang sagopon sa nasud kini subay sa plano ni Duterte nga usbon ang sistema sa gobiyerno gikan sa unitary ngadto sa federal. (Niña Mae P. Salvacion, CNU Interns/BDB)(BANATNEWS)