Tour guides nga‘adik’ ipa-rehab

CEBU, Philippines — Giawhag sa Cebu Provincial Anti-Drug Abuse Office (CPADAO) ang mga local government units ingon man ang mga tour operators nga ipaubos sa drug treatment ug rehabilitation ang mga tour guides nga magpositibo sa drug test.

Matud ni Carmen Remedios Durano-Meca, pangulo sa CPADAO, nga dili lang kutob sa pagtangtang sa permit sa tour guides kun dili tabangan usab kini nga mabag-o.

"Dapat maawhag unta sa LGU ang isig kapamilya ana nila for a treatment and rehabilitation program kay bisag unsaon nimo they are victims man gyud of the illegal drugs," matud ni Meca.  Sama sa nahitabo sa Lungsod sa Badian diin 18 ka tour guides ang nagpositibo sa drug test niadtong Marso.

Matud ni Meca nga ang iyang nasayran wala na tugoti pa nga maka-operate ang mga nagpositibo apan wala siya nasayud kun gipaubos ba sa rehabilitation.  "Ang atong purpose is it’s not just nga kutob lang tangtangan og permit to operate but other than that usa gyud sa concern sa mga tour operators is they are handling man gud sa tourist and if you are in illegal drugs you are not within yourself," matud ni Meca.

Dugang niya nga isip usa ka isla nga dagsaonon og turista, angay nga maninguha ang mga tour guides ug operators nga maayo ang feedback sa mga mobisita sa Probinsiya sa Sugbo.

"Ang ako ra gyud awhag sa mga tour guides, be responsible sa each of themselves. To act as professionals, especially you are handling tourist, local man o foreign. It does not matter on your educational attainment, ang ako nga be professional and one of that is to be cleared sa drugs," matud ni Meca. (/GMR)(BANATNEWS)