Kalidad sa tubig sa dagat sa CV gi-monitor
CEBU, Philippines — Ang regional Environmental Management Bureau office miklaro nga di lang ang kadagatan palibot sa Mactan Island ang ilang gi-monitor kondili tanang mga kabaybayonan sa mga lugar sa Central Visayas.
Ang EMB nga ilawom sa Department of Environment and Natural Resources matud pang EMB-Region 7 Director Engr. William Cuñado naghimo og water sampling sa tanang kadagatan sa rehiyon.
Sagad sa gikuhaan nila og water sample mao ang mga lugar diin sagad adunay daghang mangaligo. Ang sample sa tubig ipaubos sa water testing sa laboratory aron pag-analisar sa gidaghanon sa fecal coliform nga gikan sa hugaw sa hayop ug tawo ug uban pang matang sa kagaw nga posibleng makaapektar sa lawas sa tawo.
“Although we are experiencing that kind of situation (kuwang og tawo), I told them that we should not delay the updating of the result. Hopefully by this month, we can finalize the summary of the analysis for the first quarter of the year,” matud niya.
Sa sayo pa, ang EMB mibutyag nga adunay mga bahin sa kadagatan sa Mactan ang taas kaayo og level sa fecal coliform nga peligro sa panglawas sa mga mangaligo.
Ang EMB-7 miestablisar og Beachwatch Program nga gitahasang monitoron kada bulan ang kadagatan sa Panglao Island sa Bohol; Liloan town, Cebu; ug Mactan Islands.
Diha sa maong mga lugar adunay daghang tourist destinations ug dugokon sa local nga mga turista.(Gikan sa The Freeman/IBM)(BANATNEWS)
- Latest
