CEBU, Philippines - Kaluwasan sa mga pasahero ug aron malikayan nga pagpangabuso ang tumong ni Konsehal Pastor Alcover Jr. sa pagduso og ordinansahon nga mag-regulate sa operasyon sa mga habal-habal sa Siyudad sa Sugbo.
Giklaro ni Alcover nga wala sila nisakay sa programa ni Mayor Tomas Osmeña tungod kay dihang party-list congressman pa siya niadtong 2007 nipalabang na siya og balaudnon nga nagtinguha pag-legalize sa habal-habal.
Si Osmeña niingon nga aron pag-regulate sa habal-habal gusto niining gamiton ang sistema sa Angkas nga usa ka online booking system.
Apan gihulagway ni Alcover nga ang iyang ordinansahon lahi sa tinguha sa mayor.
Usa sa gikabalak-an sa konsehal labot sa Angkas mao nga dili tanang barangay sa siyudad maayo og signal ilabi na mga bukirang dapit.
Apan si Osmeña niingon nga nakig-alayon na siya sa mga dagkong telecommunication companies aron pagtubag sa maong isyu.
Kini nidugang nga aprubahan man o dili sa Kongreso ang Angkas iya gyud kining ipatuman. (/GMR)(BANAT NEWS)