CEBU, Philippines — Dili luwas kaligoan ang amihanang bahin sa Mactan island sumala pa sa pagtuon sa City Environment and Natural Resources Office (CENRO). Sa gihimong water sampling karong tuiga, ang tubig sa amihanang bahin sa maong isla giingong nakitaan og 1,600 most probable number (MPN) per 100 milliliters(mL) nga fecal coliform.
Mas taas kini sa 1,045 MPN per 100 mL nga nakita sa kadagatan sa Tulubhan station sa Boracay , apan mas ubos sa nakitang 2,466 MPN per 100mL Bulabog station didto gihapon sa Boracay nga gipasiradohan una sa gobiyerno aron ma-rehabilitate.
Matud pa nga ang luwas kaligoan lamang 100 MPN per 100 mL.
Si CENRO Pollution Control Officer Boy Padilla miingon nga ang maong lugar diin gikolekta ang sample sa tubig nakuha sa baybayon sa Arterra sa Barangay Punta Engaño.
Giklaro hinuon niya nga ang maong dapit agianan gyud sa mga barko ug dili kaligoanan sa mga tawo, ug usa pa, gidili usab ang paglangoylangoy sa maong dapit tungod sa kakusog sa sulog sa dagat.
Matud niya, nga ang siyudad naglibog usab tungod sa kataas sa level sa fecal coliform MPN kay aduna may sewage treatment facility (STP) ang mga residential ug commercial areas sa duol.
“Nagtuo gyud mi nga ang rason nganong taas na (MPN) kay tungod sa hugaw nga dala sa current,” matud niya. (Gikan sa The Freeman/IBM) (BANAT NEWS)