P3Milyon shabu nasakmit sa magtiayong sakop ni Franz Sabalones

CEBU, Philippines — Nadakpan sa mga sakop sa Philippine Drug Enforcement Agency (PDEA) ang magtiayon nga giingong sakop sa drug lord nga si Franz Sabalones ug nasakmitan sila og kapin sa tunga sa kilo nga shabu nga kantidad og P3 milyones.

Si Mesael Palermo ug Janice Palermo, apil sa High Value Target sa PDEA, didto madakpi sa Barangay Lagtang, dakbayan sa Talisay kaniadtong Martes sa gabii.

Ang tigpamaba sa PDEA nga si Leia Albiar miingon nga human sa pag-surrender ni Sabalones, ang magtiayon maoy nipuli sa negosyo sa pagpayuhot og drugas.

Dili sila mobaligya og ginagmay nga shabu kon adunay mopalit. Nasakmit gikan kanila ang 11 ka pakete sa shabu nga motimbang og 600 gramos.

Gipalakaw sa magtiayon nga ang ilang negosyo mao ang video karera ug ubang illegal gambling. Padayon pa nga gisukit-sukit sa mga ahente sa PDEA ang mga dinakpan.

Fake PDEA agent

Samtang, nasikop usab sa PDEA ang lalaki nga nagpaila nga ahente siya sa PDEA sa Region 6. Ang hepe sa Mambaling Police Station nga si Chief Inspector Randy Caballes miila sa dinakpan nga si Jolito Campos, 32, lumad nga taga Caloocan City, Metro Manila.

Dihang nadakpan na si Campos, nagpaila kini nga ahente usab sa PDEA-Region 6. Ang kauban ni Campos nga si Bryan Cantila, 34, taga Alaska, Mambaling giapil sa pagdakop.

Nakuha gikan kang Campos ang usa ka medium nga pakete sa gidudahang shabu, samtang nakuhaan sab si Cantila ug duha ka mga gagmay’ng pakete sa gituohang shabu.

Ang 13 gramos nga shabu nga nakuha gikan kanila ni Campos ug Cantila mokantidad og P157 mil.

Oplan Pokemon

Nikabat og 108 gramos nga shabu ang nasakmit sa kapolisan, samtang 59 ka tawo ang ilang nadakpan atol sa laing pagpahigayon og Oplan Pokemon.

Ang mga suspek nasikop sa mga sakop sa 11 ka police stations dinhi sa dakbayan sa Sugbo, ug ang 34 kanila nagumikan sa kalambigitan sa illegal nga drugas, 22 sa illegal gambling, ug usa sa pagpangawat.

Ang tanang shabu nga nasakmit gikan sa 34 ka tawo mokantidad og P298 mil.

Nakadiskubre ang kapolisan ug bag-ong modus sa mga drug pusher. Usa sa mga dinakpan nga si Lorenzo Lastimoso, 31, nigamit og bombilya nga maoy gisudlan sa drugas.

Si Superintendent Artemio Ricabo, deputy director sa kapolisan sa dakbayan, nag-awhag sa katawhan nga moabag gyud unta kanila kon mopahigayon sila og Oplan Pokemon aron madakpan ang mga nalambigit sa ilegal nga kalihukan sa ilang dapit. (Rowena D. Capistrano ug Jomelyn Largado, CNU Intern/RUB) (BANAT NEWS)